Zlatan segist vera of góður fyrir Malmö-liðið

Zlatan Ibrahimovic er að undirbúa sig fyrir Evrópumótið í Frakklandi með sænska landsliðinu en hann færi mikið af spurningum um framhaldið því ekki er enn vitað hvar þessi frábæri leikmaður muni spila á næstu leiktíð.

Zlatan Ibrahimovic hefur verið orðaður við enska liðið Manchester United en á blaðamannafundi í morgun var þessi 34 ára leikmaður spurður út í möguleikann á því að snúa aftur til gamla félagsins síns Malmö FF.

Með Malmö FF spila einmitt Íslendingararnir Kári Árnason og Viðar Örn Kjartansson en Viðar Örn hefur skorað 8 mörk í síðustu 6 deildarleikjum með liðinu og heldur betur kominn á flug eftir rólega byrjun.

„Ég er of góður fyrir Allsvenskan," var svarið sem sænsku blaðamennirnir fengu frá sínum manni í morgun. Zlatan er ekki þekktur fyrir annað en að tala með miklu sjálfstrausti. Hann hefur líka efni á því.

Zlatan Ibrahimovic var með 38 mörk og 13 stoðsendingar í 31 leik þegar lið hans Paris Saint-Germain burstaði frönsku deildina á þessu tímabili. Þetta er enginn venjuleg tölfræði hjá honum og það er ljóst að mörg af bestu liðum Evrópu vilja fá hann í framlínu sína.

Zlatan Ibrahimovic grínaðist síðan í framhaldinu þegar blaðamennirnir voru áfram forvitnir um hvaða félag myndi njóta hæfileika hans á næstu leiktíð.

„Ég vil að þið skrifið ykkar fréttir og ég ætla að sjá hver ykkar getur búið til bestu fréttina. Þegar ég verð orðinn leiður á því að lesa þær þá mun ég láta ykkur vita hvar ég ætla að spila," sagði Zlatan Ibrahimovic glottandi.

Zlatan Ibrahimovic er væntanlega að spila sína síðustu landsleiki á EM í Frakklandi í sumar en eftir það ætlar hann að einbeita sér að félagsliðinu. Hvaða lið það verður fáum við ekki að vita alveg strax.