Heimir: Vona að mönnum sé ekki sama um tapleiki

Ísland leikur í dag sinn þriðja síðasta leik áður en kemur að stóru stundinni á Evrópumeistaramótinu í Frakklandi og strákarnir okkar takast á við Cristiano Ronaldo og félaga hans í portúgalska landsliðinu í St. Etienne þann 14. júní.

Ísland mætir Grikkjum í vináttulandsleik ytra og munu okkar menn reyna að bæta upp fyrir tapið gegn Danmörku á skírdag. Raunar hefur Ísland aðeins unnið einn af átta leikjum sínum eftir að EM-sætið var tryggt og engan þegar þeir Lars Lagerbäck og Heimir Hallgrímsson hafa verið með sitt sterkasta lið.

Eftir þessa landsleikjatörn mun Ísland hafa aðeins nokkrar æfingar og tvo æfingaleiki í lok maí og byrjun júní áður en mótið hefst í Frakklandi. Heimir segir að það hafi gengið vel að nýta tímann nú um páskana með landsliðinu og að leikurinn gegn Dönum hafi kennt mönnum mikið.

„Við gerum okkur grein fyrir því að sá leikur var ekki góður – langt frá því að vera fullkominn,“ sagði Heimir í viðtali við Fréttablaðið í gær. „Við höfum verið að skerpa á ýmsum hlutum, bæði á æfingum og á fundum, og vonandi fáum við tækifæri gegn Grikklandi til að sýna betri leik.“

Ekki sama skerpa í hugsun

Heimir efast ekki um að menn hafi lagt sig fram gegn Dönum og lagt sig alla fram. „En það var ekki sama skerpa í hugsun, sem sást til dæmis í því að við töpuðum allt of mörgum návígjum, bæði í vörn og sókn. Það eru einhver prósent í hugarfari sem valda því,“ segir Heimir sem vonar að leikmenn séu ekki ónæmir fyrir tapleikjum, sama þó að um vináttulandsleiki sé að ræða.

„Ég vona að mönnum sé ekki sama um að þeir tapi leikjum. Það væri skrýtinn landsliðsmaður sem væri alveg sama um töp,“ segir Heimir en bætir við að hann hafi ekki áhyggjur af því að tap í vináttulandsleik í mars hafi áhrif á landsliðið þegar EM hefst. „Það er tvennt ólíkt að hugsa um þessi mál út frá landsliðum annars vegar og félagsliðum hins vegar. Sigur á Grikkjum á morgun [í dag] þýðir ekki endilega að menn mæti með blússandi sjálfstraust í leik gegn Noregi eftir tvo mánuði,“ segir hann en næsti leikur Íslands verður gegn Noregi í Ósló þann 31. maí. „Það sem skiptir meira máli þá er það sem gerist hjá leikmönnunum sjálfum síðustu daga og vikur á undan.“

Rennum blint í sjóinn

Heimir veit ekki hverju hann á að búast við af Grikkjunum í kvöld. Liðið sé að byggja sig upp eftir slæma undankeppni fyrir EM 2016 og tíð þjálfaraskipti. Fjórum fastamönnum í liðinu hafi þar að auki verið gefið frí í leiknum í dag.

„Við erum því að renna blint í sjóinn. Það væri gott ef þeir myndu spila með þrjá miðverði, eins og Danir. Við lærðum mikið af því og erum með lausnir sem við viljum gjarnan útfæra í þessum leik. Það væri gott ef leikmenn gætu sýnt að þeir séu búnir að meðtaka það sem fór úrskeiðis gegn Dönum,“ segir Heimir.

Leikurinn hefst klukkan 17.30 í dag og fer fram á Karaiskakis-leikvanginum í Pireus-borg, rétt utan höfuðborgarinnar Aþenu. Það er heimavöllur Olympiakos og tekur 33 þúsund manns í sæti. Grikkir mættu þar Svartfellingum á fimmtudag og unnu 2-1 sigur en aðeins þrjú þúsund áhorfendur voru á leiknum.