Lars veit ekki hvort hann haldi áfram með íslenska landsliðið

Lars Lagerbäck segir ekkert enn ákveðið um það hvort að hann hætti sem landsliðsþjálfari íslenska karlalandsliðsins í knattspyrnu eða verði áfram fram yfir HM 2018.

Lagerbäck var spurður út í framtíð sína með landsliðið á blaðamannafundi KSÍ í dag. Lagerbäck hefur stýrt Íslandi í rúm fjögur ár og síðustu tvö samhliða Heimi Hallgrímssyni, sem yrði þá áfram meðþjálfari Lagerbäck. Heimir mun annars taka einn við liðinu.

Lagerbäck er 67 ára gamall og ætlaði að hætta þjálfun eftir núverandi samning. Hann verður sjötugur rétt eftir að HM í Rússlandi lýkur sumarið 2018.

„Það er ekkert ákveðið. Ég get því ekkert sagt annað en það að við Geir höfum rætt saman," sagði Lars Lagerbäck.

Lars Lagerbäck á glæstan feril að baki og kom Svíþjóð fimm sinnum á stórmót í knattspyrnu sem landsliðsþjálfari. Hann stýrði einnig landsliði Nígeríu á HM 2010. Geir Þorsteinsson, formaður KSÍ, hafði lagt ríka áherslu á að halda Lagerbäck áfram í þjálfarateymi landsliðsins.

„Ég vil bíða aðeins og sjá til hvernig mér líður. Ég er ekki að verða yngri og þessu fylgir mikil ferðalög og fleira í þeim dúr. Þegar maður hugsar þannig þá er ég ekki viss að maður eigi að halda áfram," sagði Lars.

„Ég hef notið þessara fjögurra ára. Stutta svarið er að ég veit ekki en ekkert hefur verið útilokað," sagði Lars.

„Ég ætti auðvitað að svara sem fyrst en ég vil að leikmenn viti þetta fyrst. Ég verð að ákveða mig áður en EM byrjar og ég þarf því að svara í byrjun maí, í allra síðasta lagi," sagði Lars að lokum.