Eiður Smári: Þetta er greinilega stór frétt í fótboltanum hérna

Eiður Smári Guðjohnsen samdi í dag til eins árs við norska stórliðið Molde og æfði með því í fyrsta sinn í morgun. Hann var síðast á mála hjá Shijiazhuang Ever Bright í Kína.

Molde er 14. atvinnumannaliðið sem Eiður Smári spilar fyrir og verður hann sjöundi Íslendingurinn sem klæðist treyju Molde. Síðast spilaði Björn Bergmann Sigurðarson fyrir félagið 2014.

Sjá einnig:Solskjær: Svíþjóð hefur Zlatan, Danir hafa Laudrup en Ísland hefur Eið Smára

„Það er svona rúm vika síðan ég vissi af áhuga Molde en svo sendi [Ole Gunnar] Solskjær mér skilaboð og spurði hvort það væri í lagi að hann myndi hringja í mig og spjalla um þann möguleika að ég kæmi yfir og spilaði fyrir hann hjá Molde,“ segir Eiður Smári í viðtali við Vísi.

„Ef Solskjær vill hringja og tala um eitthvað þá svarar maður bara, hvort sem hann vill ræða þetta eða eitthvað annað.“

Asía ekki inni í myndinni

Eiður Smári var búinn á æfingu og með helstu skylduverkin sem fylgja því að skipta um félag þegar Vísir ræddi við hann í dag. Hann er spenntur fyrir árinu í Molde enda hentar honum vel að spila í Noregi á þessu stigi ferilsins með Evrópumótið framundan.

„Þetta þróaðist mjög jákvætt. Tímasetningin á þessu er fín. Það er mánuður í mót þannig ég fæ smá undirbúningstímabil. Aðstæður eru mjög góðar hjá félaginu og hér er allt til alls til að fara að einbeita sér að fótbolta,“ segir Eiður, en þekkir hann Solskjær persónulega eftir daga þeirra á Englandi?

Sjá einnig:Eiður Smári ein stærsta stjarnan sem hefur spilað á Norðurlöndum í 15 ár

„Nei, ekki þannig nema við bárum bara gagnkvæma virðingu fyrir hvor öðrum. Við heilsuðumst bara en ekkert meira en það.“

Þegar ljóst var að Eiður Smári yrði ekki áfram í Kína höfðu nokkur félög áhuga, meðal annars í Asíu en það kom ekki til greina að vera áfram þar.

„Ég var búinn að ákveða það. Mér leið vel þar en það var bara langt í burtu. Ég er með lítið barn og vildi því vera aðeins nær allavega,“ segir Eiður Smári.

„Það voru hin og þessi félög í þessu. Rétt eftir áramót kom eitthvað upp í Asíu en ég var búinn að ákveða að ég vildi vera í Evrópu eða á Norðurlöndum. Miðað við það er þetta mjög fín lausn.“

Alltaf undir pressu

Norskir fjölmiðlar hafa ekki haft undan að moka út fréttum um komu Eiðs Smára í dag enda um risanafn að ræða í fótboltaheiminum og verður hann líklega stærsta nafnið í úrvalsdeildinni þar í landi í ár.

„Ég hef aðeins tekið eftir þessu og les það á fréttamiðlum á öðru hvernig það er. Þeim finnst þetta greinilega stór frétt í fótboltanum hérna. Ég sjálfur er aðallega að spá í að vera í standi og vera tilbúinn þegar mótið byrjar,“ segir Eiður Smári hógvær, en finnur hann fyrir aukinni pressu vegna ferilskrár sinnar?

Sjá einnig:Myndband af Eiði Smára á fyrstu æfingu með Molde

„Ég held að ég hef yfirleitt alltaf verið undir einhverskonar pressu á ferlinum. Auðvitað fylgir það fótboltanum. Ég hef alltaf sagt að fótboltinn er lang skemmtilegastur undir pressu.“

Undir sér komið

Það styttist í annan endan á ferli Eiðs Smára og því vill hann spila sem mest. Hann verður 38 ára á árinu og á fyrir höndum sitt fyrsta stórmót á ferlinum.

„Hver einasti leikmaður fer með því hugarfari til nýs liðs að hann vilji spila. Í hreinskilni sagt á mínum aldri vil ég spila sem mest. Ég útskýrði fyrir Solskjær stöðuna hjá mér. Ég vil bara njóta þess að spila þennan tíma sem ég á eftir og hef líkamlega burði til,“ segir Eiður Smári.

„Svo útskýrði Solskjær hvað hann vantar. Hann er með mjög ungan hóp og vantaði reynslumikinn leikmann þegar mitt nafn kom upp í huga hans. Það var svona mergur málsins,“ segir Eiður.

Ein ástæða þess að hann samdi við Molde er hversu vel það hentaði fyrir árið með landsliðinu.

„Það jákvæða við þetta er, að ég fæ fínan tíma til að undirbúa mig og deildin verður í fullum gangi fram að sumri. Er þetta svo ekki bara allt undir mér komið?“ segir Eiður Smári Guðjohnsen.