Óli Stef: Langar stundum að vera með

„Aðalatriðið er að menn hugsi skýrt og slaki á. Að þeir læri líka af þessum leik gegn Hvít-Rússum,“ segir besti handboltamaður í sögu Íslands, Ólafur Indriði Stefánsson, yfirvegaður á fjölmiðlahóteli íslenska landsliðsins í Katowice. Ólafur er í nýju hlutverki í Póllandi en hann er nú annar aðstoðarþjálfara Arons Kristjánssonar. Það er auðvitað stutt síðan Ólafur var leiðtoginn í þessum hópi og hans tenging við strákana, sem og reynsla, hans ætti að reynast liðinu vel.

Varnarframmistaða Íslands í leiknum gegn Hvít-Rússum var ein sú slakasta í sögu landsliðsins. Liðið fékk á sig 39 mörk í leiknum og stóð ekki steinn yfir steini í varnarleiknum.

„Varnarleikurinn var auðvitað slakur og þremenningarnir sem eiga að bera varnarleikinn uppi þurfa að taka sig saman í andlitinu. Að dreifa ábyrgðinni á bakverðina og þar í kring. Hugsa skýrt og vinna vel úr þessum tíma sem við höfum fram að leik,“ segir Ólafur en þjálfararnir gera ýmislegt til þess að koma mönnum aftur á lappirnar fyrir stórslaginn gegn Króötum.

Er leikurinn hefst gæti sú staða verið uppi að íslenska liðið verði að vinna Króata. Að öðrum kosti sé liðið á leið heim. Ólafur þekkir þessa stöðu vel með landsliðinu. Hann var í liðinu á HM 2007 er það vann Frakka með bakið upp við vegg og svo aftur í sömu stöðu gegn Dönum á EM 2010.

„Þetta er akkúrat þannig ástand núna og ég vil nú ekki „jinxa“ neitt með því að segja að það gerist þá aftur núna að við bregðumst rétt við. Þeir sem mest mæðir á, varnarstrákarnir, hafa kannski ekki upplifað það en maður reynir að koma því til skila að allt sé mögulegt. Það er gott tækifæri núna á að vinna þá. Ef við tæklum oftar. Það voru líklega 60 prósent færri tæklingar í síðasta leik en þeim fyrsta. Það segir okkur að menn voru alltaf aðeins á eftir. Við reyndum að tækla þetta fyrir síðasta leik en það er eins og það séu einhver álög á okkur. Við gátum ekki hlaupið út. Tölfræðin að við getum ekki unnið leik eftir sigur á Noregi heldur því áfram. Það er skrítið.“

Ólafur er mjög virkur á bekknum. Talar mikið við strákana og reynir að hafa áhrif á þann hátt sem hann getur. Klæjar hann samt ekkert í fingurna að fara inn á og taka málin í sínar hendur inni á vellinum?

„Þetta er annað starf sem ég er í núna en jú, það er leiðinlegt stundum að geta ekki farið inn á. Ég þarf auðvitað að sætta mig við það sem fyrst og reyna að gera allt sem ég get á bekknum. Þegar út í leik er komið þá eiga upplýsingarnar samt að vera komnar inn í frumurnar á mönnum. Þjálfarinn á bara að að styðja við mennina. Ég reyni að hafa áhrif og bregðast við en flest gerist á parketinu og í hausnum á mönnum fyrir leikina.“

Króatar eru með nokkuð breytt lið frá síðustu mótum. Það er kominn nýr þjálfari sem hefur yngt liðið upp. Mjög öflugir leikmenn en ekki eins reyndir. Ólafur hefur mikla trú á strákunum okkar fyrir slaginn stóra.

„Ég hef fulla trú á strákunum. Þetta er góður séns en við verðum að nýta tímann fram að leik mjög vel. Fyrst komast yfir tapið. Svo fara menn í jákvæða sjálfsskoðun fyrir þessa orrustu. Þetta er allt eða ekkert staða. Við getum verið í frábærum málum eða farið heim.“