Heimir: Diego er ekki með íslenskt vegabréf

Heimir Hallgrímsson, annar landsliðsþjálfara Íslands í fótbolta, segir ótímabært að ræða um Diego Jóhannesson, spænska Íslendinginn, sem möguleika í íslenska landsliðið.

Diego, sem er 22 ára gamall og spilar með Real Oviedo í B-deildinni á Spáni, hefur ekki farið leynt með áhuga sinn á að spila fyrir íslenska landsliðið.

Í viðtali við Fréttablaðið í desember sagðist hann vilja spila fyrir Ísland sem Íslendingur en faðir hans er frá Íslandi. Hann hefur búið alla sína ævi á Spáni og talar ekki íslensku.

"Ég hitti þá fegða í desember og þetta virkar afskaplega ljúfur strákur. Hann er bara ekki með íslenskt vegabréf" sagði Heimir á blaðamannafundi landsliðsins í dag.

"Það er því algjörlega ótímabært að ræða þennan leikmann fyrr en hann fær íslenskt vegabréf. Hann er samt bara 22 og spilar í 2. deildinni á Spáni og gæti því verið framtíðar leikmaður fyrir íslenska landsliðið," sagði Heimir Hallgrímsson.