Röng kona krýnd Ungfrú alheimur

Kynnir á fegurðarsamkeppninni Ungfrú Alheimur, sem fór fram í Las Vegas í nótt gerði vandræðaleg mistök þegar hann tilkynnti um úrslitin. Hann greindi frá því að Ungfrú Kólumbía hefði farið með sigur af hólmi og fagnaði hún því heitt og innilega með kórónu á höfði í nokkrar mínútur.

Þá steig kynnirinn fram að nýju og viðurkenndi að hann hefði einfaldlega lesið vitlaust á kortið. Ungfrú Kólumbía hafði aðeins lent í öðru sæti og það var í raun Ungfrú Filippseyjar sem hafði farið með sigur af hólmi. Gleðitár fegurðardrottningarinnar frá Kólumbíu breyttust þannig á örskotsstundu í sorgartár.