Repúblíkanar hlynntari loftárásum á Aladín en Demókratar

Þrír af hverjum tíu kjósendum Repúblíkanaflokksins eru hlynntir því að gera loftárásir á Agrabah. Hið skondna við það er að Agrabah er ekki til nema í teiknimyndum Disney um Aladín. Þetta er meðal þess sem kemur fram í nýrri könnun sem fyrirtækið Public Policy Polling gerði á dögunum.

Af þeim þrjátíu prósentum sem styðja árásirnar styðja 45 prósent Donald Trump í forvali flokksins. Í ljós kom einnig að flestir þeirra sem tóku þátt styðja Trump eða 34 prósent. 22 prósent stuðningsmanna Trump vildu ekki gera loftárásir á Aladín, andann og aðra íbúa Agrabah.

Stuðningsmenn Demókrata voru einnig spurðir út í afstöðu sína til loftárása á Agrabah og voru tæplega tveir af hverjum tíu hlynntir þeim. 36 prósent voru hins vegar andvígir.

Fleiri skrítnar spurningar mátti finna í könnunni en þátttakendur voru meðal annars spurðir hvort þeir hefðu trú á því að múslimar í New Jersey hefðu fagnað þegar Tvíburaturnarnir féllu og hvort ætti að koma á fót gagnagrunni yfir alla múslima í Bandaríkjunum.

Niðurstöðurnar í heild sinni má sjá hér. Ekki er þar að finna upplýsingar um úrtak eða svarhlutfall.