Yljaðu þér á meðan óveðrið gengur yfir: Jólasúkkulaði með miklum rjóma

Búið er að vara fólk við því að vera á ferli á illa búnum bílum og er mikið um að börn hafi verið látin vera heima í stað þess að fara í skólann. Líklega eru því margir heima við að ilja sér í óveðrinu sem nú fer bráðum að ná hármaki.

Vísir fékk Evu Laufey til að ráðleggja lesendum hvernig á að gera gott heitt súkkulaði. „Ég legg til að þið fáið ykkur þennan ómótstæðilega súkkulaðibolla, komið ykkur vel fyrir með teppi og njótið,“ segir hún en uppskrifin er eftirfarandi:

• 1 líter mjólk
• 175 g suðusúkkulaði
• 1 stk pipp súkkulaði (40 g)
• 2 dl vatn
• smá salt

Hitið vatn og látið súkkulaðið bráðna í því, passið ykkur á því að sjóða ekki vatnið. Hrærið vel í á meðan. Þegar súkkulaðið er bráðið þá bætið þið mjólkinni út í og hitið þar til fer að sjóða. Að lokum þá bætið þið smá salti út í, leyfið þessu að malla í smá stund við vægan hita.

Gott er að þeyta rjóma og setja væna skeið út í bollann en Eva Laufey mælir einnig með að setja vanilluís út í súkkulaðið.