Evrópumeistararnir fengu hetjulegar móttökur í Leifsstöð

Sunna Rannveig Davíðsdóttir og Bjarki Þór Pálsson fengu hetjulegar móttökur í Leifstöð nú síðdegis þegar nýkrýndir Evrópumeistaranir komu heim eftir flotta ferð til Englands.

Sunna Rannveig og Bjarki, sem bæði keppa í blönduðum bardagalistum fyrir Mjölni, urðu Evrópumeistarar áhugamanna, en þetta var í fyrsta sinn sem Evrópumót áhugamanna er haldið.

Sjá einnig:Verð að heyra í dóttur minni áður en ég fer í búrið

Bjarki Þór lagði Búlgarann og heimsmeistarann Dorian Dermend­zhiev í mögnuðum bardaga í veltivigt sem fór alla leið. Sunna Rannveig mætti hinni sænsku Önju Saxmark í úrslitum og kláraði hana með tæknilegu rothöggi í annarri lotu.

Á milli 30-40 manns; vinir, ættingjar og félagar hjá Mjölni, voru mætt til að taka á móti Evrópumeisturum þegar þau lentu í Leifsstöð í dag.

Valtýr Björn Valtýsson, fréttamaður íþróttadeildar 365, var á svæðinu og tók meðfylgjandi myndir, en nánar verður fjallað um heimkomuna í sjónvarpsfréttum Stöðvar 2 í kvöld.