Arnór Ingvi með mark og stoðsendingu þegar Norrköping tryggði sér titilinn

Arnór Ingvi Traustason varð í dag sænskur meistari með Norrköping en liðið bar 0-2 sigurorð af Kára Árnasyni og félögum í Malmö í lokaumferð deildarinnar. Þetta er 13. meistaratitill Norrköping en liðið varð síðast meistari árið 1992.

Arnór fór mikinn í leiknum en hann lagði fyrra mark Norrköping upp fyrir Emir Kujovic eftir hálftíma leik. Kujovic launaði Arnóri svo greiðann þegar hann lagði upp mark fyrir Íslendinginn í uppbótartíma.

Arnór átti frábært tímabil með Norrköping en hann skoraði sjö mörk og átti 10 stoðsendingar í 29 deildarleikjum.

Norrköping, sem endaði í 12. sæti sænsku deildarinnar í fyrra, var með eins stigs forystu á IFK Göteborg fyrir lokaumferðina en Gautaborgarliðið náði aðeins jafntefli gegn Kalmar í dag, 2-2. Hjálmar Jónsson var í byrjunarliði Göteborg og lék fyrstu 88 mínútur leiksins.

Haukur Heiðar Hauksson var ekki í leikmannahópi AIK sem gerði 1-1 jafntefli við Örebro á útivelli en liðið átti möguleika á meistaratitlinum fyrir lokaumferðina.

Hjörtur Logi Valgarðsson og Eiður Aron Sigurbjörnsson léku allan leikinn í vörn Örebro sem átti frábæran endasprett í deildinni. Liðið var taplaust í síðustu níu leikjum sínum, vann sjö og gerði tvö jafntefli.

Örebro endaði í 9. sæti deildarinnar með 37 stig, jafnmörg og Helsingborg en verri markatölu. Arnór Smárason lék allan leikinn fyrir Helsingborg sem tapaði 1-2 fyrir Häcken í dag.

Jón Guðni Fjóluson og Rúnar Már Sigurjónsson voru á sínum stað í byrjunarliði Sundsvall sem tapaði 4-2 fyrir DJurgården á útivelli. Sundsvall endaði í 12. sæti deildarinnar.

Þá tapaði Hammarby, 2-1, fyrir Halmstads á útivelli. Ögmundur Kristinsson stóð í marki Hammarby og Birkir Már Sævarsson lék allan leikinn í stöðu hægri bakvarðar. Hammarby endaði í 11. sæti í deildinni.