Bolt minnir á sig með látum í Lundúnum

Usain Bolt kom langfyrstur í mark í seinni undanúrslitariðli 100 metra hlaups karla á Afmælisleikunum í London sem fram fara þessa helgina, en mótið er hluti af Demantamótaröðinni.

Bolt hefur lítið keppt undanfarin misseri og hljóp fyrr í sumar á 10,04 sekúndum sem var hans versti tími í níu ár.

Margir spekingar hafa efast um form hans að undanförnu og hvort hann geti varið heimsmeistaratitilinn í Peking eftir mánuð, en Bolt svaraði gagnrýnisröddum sérfræðinganna með látum í kvöld.

Þessi magnaði sexfaldi Ólympíumeistari byrjaði rólega eins og alltaf en skokkaði á endanum í mark á rennblautri brautinni á Ólympíuvellinum í London.

Þrátt fyrir skelfilegar aðstæður og þá staðreynd að hann hljóp í mótvindi kom hann í mark á 9,87 sekúndum. Michael Rodgers frá Bandaríkjunum var annar á 9,92 sekúndum.

Bolt hleypur til úrslita eftir klukkustund og má fastlega búast við sigri Jamaíkumannsins, en samlandi Bolts, Kemar Bailey-Cole, vann fyrri undanúrslitariðilinn á 10,02 sekúndum.