Íslensku stelpurnar gætu lent í riðli með nýkrýndum Evrópumeisturum

Íslenska kvennalandsliðið í körfubolta tekur nú aftur þátt í Evrópukeppni eftir sex ára hlé og á laugardaginn kemur í ljós með hvaða liðum íslenska liðið lendir í riðli í  undankeppni Evrópumóts kvenna sem fer fram árið 2017 í Tékklandi.  Þetta kemur fram í fréttatilkynningu frá KKÍ.

Íslenska liðið er í fjórða styrkleikaflokki. Dregið verður í München í Þýskalandi en fulltrúi Íslands á riðladrættinum verður Guðbjörg Norðfjörð varaformaður KKÍ.

Ásamt því að draga í undankeppni Evrópumótsins verður einnig dregið í Evrópukeppnir félagsliða kvenna, Eurocup og Euroleague. Hefst dagskráin kl. 13:15 að íslenskum tíma og er áætlað að henni ljúki um 14:30.

Er þetta í fyrsta sinn frá undankeppninni 2009 sem Ísland er skráð til leiks. Ísland er í fjórða og neðsta styrkleikaflokki ásamt Hollandi, Lúxemborg, Sviss, Bosníu og Albaníu.

Dregið verður í níu riðla. Sex þeirra verða fjögurra liða og þrír þeirra þriggja liða. Ísland er í neðsta styrkleikaflokknum og verður því alltaf í fjögurra liða riðli.

Efsta sætið í hverjum riðli fer áfram í lokakeppnina ásamt þeim sex liðum sem eru með bestan árangur í öðru sæti. Til að finna út hvaða lið standa best að vígi í öðru sæti verða úrslit leikja þess liðs sem endar í neðsta sæti í fjögurra liða riðlunum tekin út. Tékkland er komið áfram í i lokakeppnina þar sem þeir eru gestgjafar.

Því er ljóst að stórþjóðir eru á leið til Íslands og nýkrýndir Evrópumeistarar Serba gætu verið eitt þeirra liða. Svíþjóð er í öðrum styrkleikaflokki og Finnar í þeim þriðja.

Undankeppnin fer fram í þremur gluggum og verður fyrsti glugginn núna í nóvember. Annar í febrúar á næsta ári og svo lokaglugginn í nóvember 2016. Leikið er heima og að heiman.

Dagsetningar leikja:

Gluggi 1 – leikdagar 21. og 25. nóvember 2015

Gluggi 2 – leikdagar 20. og 24. febrúar 2016

Gluggi 3 – leikdagar 19. og 23. nóvember 2016

Styrkleikaflokkur 1:

1. Serbía

2. Frakkland

3. Spánn

4. Hvíta-Rússland

5. Tyrkland

6. Rússland

7. Svartfjallaland

8. Litháen

9. Slóvakía

Styrkleikaflokkur 2:

10. Grikkland

11. Króatía

12. Lettland

13. Svíþjóð

14. Ítalía

15. Úkranía

16. Ungverjaland

17. Pólland

18. Rúmenía

Styrkleikaflokkur 3:

19. Bretland

20. Belgía

21. Slóvenía

22. Portúgal

23. Búlgaría

24. Ísrael

25. Þýskaland

26. Eistland

27. Finnland

Styrkleikaflokkur 4:

28. Holland

29. Lúxemborg

30. Sviss

31. Bosnía og Hersegóvína

32. Albanía

33. Ísland