Ragnar: Evrópudeildin frekar óspennandi

„Við lærðum mikið af fyrri leiknum, þar sem fóru illa með okkur á taktískan hátt,“ sagði Ragnar Sigurðsson í samtali við Vísi fyrir æfingu landsliðsins á Laugardalsvelli í morgun, aðspurður um fyrri leik Íslands og Tékklands í nóvember á síðasta ári.

„Við tilbúnir fyrir þessi atriði ef þeir framkvæma þau aftur. Annars ætlum við bara að spila okkar leik og reyna að klára þetta.“

Ragnar leikur með Krasnodar í rússnesku úrvalsdeildinni en liðinu gekk afar vel á nýliðnu tímabili og endaði í 3. sæti. Ragnar segir þó að það hafi verið vonbrigði að ná ekki 2. sætinu sem gefur þátttökurétt í Meistaradeild Evrópu.

„Fyrirfram bjóst kannski enginn við þessu en við hefðum átt að taka 2. sætið sem við vorum með í okkar höndum.

„Við klúðruðum þessu í endann,“ sagði varnarmaðurinn sterki en Krasnodar varð að gera sér sæti í Evrópudeildinni að góðu.

„Það hefði verið mjög gaman að spila aftur í Meistaradeildinni. Evrópudeildin er frekar óspennandi fyrst maður var svona nálægt Meistaradeildarsæti.“

Ragnar, sem kom til Krasnodar í byrjun árs 2014, líkar lífið vel í Rússlandi. Hann verður áfram hjá Krasnodar, enda nýbúinn að framlengja samning sinn við félagið til ársins 2018.

„Það er mikil uppbygging hjá félaginu. Það verið að byggja nýjan risastóran völl þannig að ég er spenntur fyrir framhaldinu,“ sagði Ragnar en hversu sterk er rússneska deildin?

„Hún er frekar sterk og sú sterkasta sem ég hef spilað í. Standardinn þarna er mjög hár,“ sagði Ragnar að endingu.