Irving úr leik | Áfall fyrir Cleveland

Kyrie Irving leikur ekki meira með Cleveland Cavaliers í lokaúrslitum NBA-deildarinnar í körfubolta vegna hnémeiðsla.

Irving fór meiddur af velli í framlengingu í fyrsta leik Cleveland og Golden State Warriors í úrslitunum í nótt. Golden State hafði betur, 108-100.

Sjá einnig: 44 stig frá James dugðu ekki til.

Leikstjórnandinn gekkst undir nákvæmari skoðun í dag og þá kom í ljós að vinstri hnéskelin er brotin. Hann mun gangast undir aðgerð á næstu dögum en áætlað er að hann verði frá í 3-4 mánuði.

Þetta er mikið áfall fyrir Cleveland sem er einnig án framherjans Kevins Love sem meiddist í fjórða leiknum gegn Boston Celtics í fyrstu umferð úrslitakeppninnar.