Bestu byrjanir táninga í körfunni: Gerði betur en Tryggvi og Jón Arnór

Atli Freyr var í byrjunarliði Valsmanna í fyrsta leik sem var jafnframt hans fyrsti leikur í úrvalsdeild karla.

Það var sögulegt út af fyrir sig að byrja leik fyrir eitt besta lið landsins aðeins sextán ára gamall. Hann var aftur á móti langt frá því að vera hættur að skrifa nýjan kafla í íslensku körfuboltasöguna.

Tölfræðivefurinn Körfustatt.is hefur opnað nýjar víddir inn í tölfræði Bónusdeildanna og nú er hægt að spyrja gagnagrunninn að því hvaða táningur væri með hæsta framlagið í fyrstu tveimur leikjum sínum í úrvalsdeildinni. 

Í ljós kemur að frammistaða Ara í fyrstu tveimur leikjum sínum er langmesta framlag sem táningur hefur boðið upp á í tveimur fyrstu leikjunum sínum á ferlinum. Hann hoppar upp fyrir goðsagnirnar Tryggva Snæ Hlinason og Jón Arnór Stefánsson sem voru áður í tveimur fyrstu sætunum enda komu þeir mjög öflugir inn í deildina á sínum tíma áður en þeir fóru og gerðu garðinn frægan á atvinnumannaferli í Evrópu.

Atli Freyr er með 17,0 stig og 13,0 fráköst að meðaltali í leik í þessum tveimur sigurleikjum Vals á móti Stjörnunni og Grindavík sem eru auðvitað Íslandsmeistaralið síðustu tveggja ára. Atli nýtti skotin sín afar vel eða 72% (13 af 18) og er með 2,5 þriggja stiga körfur að meðaltali í leik eftir tvær umferðir. Framlagið hans er því upp á 27,5 að meðaltali í leik sem er mögnuð tölfræði.

Það þarf því ekki að koma á óvart að Ari hoppi beint upp í fyrsta sætið á listanum yfir hæsta framlag táninga í fyrstu tveimur leikjum sínum. Hann er ekki aðeins efstur því hann er langefstur.

Metið átti Tryggvi Snær Hlinason frá byrjun hans með Þórsurum tímabilið 2016-17. Tryggvi var með 16,0 framlagsstig að meðaltali í leik í fyrstu tveimur leikjunum en hann var með 6,5 stig, 6,0 fráköst og 3,5 varin skot að meðaltali í þessum leikjum sem voru á móti Stjörnunni og Tindastól.

Jón Arnór Stefánsson dettur niður í þriðja sætið en hann var með 16,0 framlagsstig að meðaltali í leik í fyrstu tveimur leikjunm sínum með KR tímabilið 2000-01. Jón Arnór var með 17,5 stig, 3,0 stoðsendingar og 2,5 fráköst að meðaltali í fyrstu tveimur leikjunum. Byrjun Jóns Arnórs var reyndar svolítið sérstök því fyrstu leikir hans á Íslandsmótinu höfðu komið í úrslitakeppninni vorið á undan þar sem hann var með 8,0 stig að meðaltali á 17,4 mínútum í leik þegar KR tryggði sér Íslandsmeistaratitilinn. Það tímabil lék hann ekki í deildinni þar sem hann var við nám í Bandaríkjunum.

Í fjórða til fimmta sæti er Elvar Már Friðriksson sem var með 14,5 framlagsstig að meðaltali í leik í fyrstu tveimur leikjum sínum með Njarðvík tímabilið 2011-12. Hann var með 16,5 stig og 3,0 stoðsendingar að meðaltali í leik.

Við hlið Elvars er Ómar Örn Sævarsson sem skilaði 14,5 framlagsstigum í fyrstu tveimur leikjum sínum með ÍR 2001-02 tímabilið en hann var með 8,5 stig og 9,5 fráköst að meðaltali í leik.

Í næstu sætum eru síðan Guðni Hafsteinsson (14,5), Sverrir Þór Sverrisson (14,0), Hermann Hauksson (12,9) og Örlygur Aron Sturluson (11,0).