Héldu upp á tökulok með stæl

Gamanþættirnir Punkturinn hafa verið í tökum frá því í nóvember en aðaltökutímabilið var í maí með síðasta tökudegi 31. maí.

Leikarar, tæknifólk, vinir og velunnarar héldu upp á tökulok með „wrap partý" þar sem skálað var fyrir vel heppnuðum tökum ásamt því að sýna nokkra sketsa sem eru væntanlegir með þáttunum á Stöð 2 í ágúst.

Hópurinn á bak við Punktinn sat stíft allt síðastliðið ár yfir handritsgerð fyrir seríuna og er óhætt að segja að útkoman er frábær.  Sýnishorn sem var sýnt í partýinu á föstudaginn fékk frábærar viðtökur gesta í salnum og greinilegt að húmorinn hjá Punktinum hittir beint í mark.  

Kjarninn í hópnum hefur verið að leika sér með gerð sketsa síðan í Menntaskólanum í Kópavogi og síðan hafa nokkrir einstaklingar bæst í hópinn og eftir stendur samheldin hópur hæfileikaríks fólks sem hefur ekkert annað á stefnuskránni en að framleiða gamanþætti þar sem ekkert er heilagt og allt er fyndið.

Hópinn skipa Sindri Grétarsson, Bjarki Már Jóhannsson, Guðmundur Heiðar Helgason, Daníel Grímur Kristjánsson, Þórunn Guðlaugsdóttir, Egill Viðarsson, Viktor Bogdanski, Tanja Björk og Karl Lúðvíksson en til viðbótar er frábær hópur af leikurum og vinum í kringum hópum sem yfirleitt er kippt í þegar verið er að skipa í hlutverk.  

Punkturinn hefur verið á Youtube í nokkur ár og fengið góðar undirtektir. Þátturinn var einnig á Monitor á sínum tíma en stefndi alltaf á að fara í sjónvarp og núna koma þau til með að gleðja áhorfendur Stöðvar 2 frá 15. ágúst en þá fara þættirnir í loftið.