10-11 og Iceland selja breska klaka

Verslanir 10-11 og Iceland selja klakka sem fluttir eru inn frá Bretlandi. Athugull lesandi Vísis benti á þetta og spurði hvort framleiðsla á klökum borgi sig ekki í landi sem útnefnt hefur verið með öruggustu vatnsbirgðir í heimi.  

Árni Pétur Jónsson, eigandi 10-11 og Iceland segir verslanir fyrirtækjanna bæði selja íslenska og breska klaka en bresku klakarnir séu ódýrari í innkaupum en þeir íslensku. „Það hefur verið mikill áhugi fyrir því að kaupa þessa tegund af klökum. Eins og alltaf þegar það er eftirspurn eftir vöru þá bregðumst við því og bjóðum upp á hana. Neytandanum virðist líka þessi vara og spyr eftir henni þegar hún er ekki hjá okkur,“ segir Árni.

Ísmanninum segir klakaframleiðslu dýra á Íslandi

Ísmaðurinn er eini aðilinn sem framleiðir klaka hér á landi. Jón Þór Eyþórsson, framkvæmdastjóri Ísmannsins, segir talsverðan rekstarkostnað vera við framleiðslu á klökum hér á landi. Tæki og laun séu stærsti þátturinn í rekstri fyrirtækisins. „Það eru engar vélar sem pakka þessu hérna, þessu er öllu pakkað af starfsmönnum,“ segir Jón Þór.

Jón Þór segist erfitt að keppa við fjöldaframleiðslu stórrar verslunarkeðju á borð við Iceland. „Þegar þetta er partur af risakeðju um allan heim þá skil ég að hægt sé að gera þetta eitthvað ódýrara,“ segir Jón Þór.

Hann segir Ísmanninn finna fyrir því að samkeppni hafi aukist. Fyrirtækið hafi þó ekki miklar áhyggjur af því enda séu bresku klakarnir einungis seldir í tveimur verslunum.