Got Talent í heimsmetabók Guinness

Format-þátturinn Got Talent er kominn í heimsmetabók Guinness sem vinsælasti format-þáttur allra tíma. Format-þáttur þýðir í raun að Got Talent er þáttur sem fylgir vissri uppskrift sem hægt er að staðfæra í hvaða landi sem er.

Þátturinn fór fyrst í loftið í Bretlandi undir nafninu Britain‘s Got talent. Síðan þá hafa 58 lönd gert sína útgáfu af þáttunum, meðal annars Ísland, en sjónvarpsþátturinn Ísland Got Talent hefur átt góðu gengi að fagna síðustu vikur á Stöð 2.

Tónlistar- og raunveruleikasjónvarpsmógúllinn Simon Cowell á heiðurinn að formati Got Talent en þátturinn skákaði þættinum Strictly Come Dancing sem var hingað til talinn vinsælasti format-þáttur heims af heimsmetabók Guinnes.