Segir Mayweather hafa lamið sig

Hnefaleikakappinn Floyd Mayweather Jr. stendur í ströngu þessa dagana en fyrrum unnusta hans er búin að kæra hann.

Shantel Jackson heldur því fram að Mayweather hafi farið illa með sig. Hann hafi lamið hana og sett sónarmynd á netið þar sem hann hélt því fram að sambandið hafi endað því hún hafi farið í fóstureyðingu.

Jackson segir einnig að Mayweather hafi hótað að setja nektarmyndir af henni á netið ef hún tæki ekki mynd af sér og rapparanum Nelly af netinu.

Parið var saman í sjö ár en Jackson segist ekki hafa þolað meira af barsmíðum og niðurlægingum.

Mayweather sat í tvo mánuði í fangelsi árið 2012 fyrir að lemja aðra kærustu. Tvö af þremur börnum þeirra horfðu upp á þá barsmíðar. Hann játaði sök sína í málinu.