Árið 2014 langt frá því versta í flugsögunni

Fleiri hundruð manns hafa látið lífið í flugslysum það sem af er ári, en 2014 er þó langt frá því að vera það mannskæðasta í flugsögunni.

Í samantekt CNN segir að flugslys hafi verið sérstaklega áberandi í fjölmiðlum síðustu mánuði þar sem allt að 704 flugfarþegar hafa látist í fjórum stærri slysum eða atburðum sem áttu sér stað á 138 daga tímabili.

MH17-vél Malaysia Airlines var skotin niður í austurhluta Úkraínu þann 17. júlí þar sem 298 farþegar og áhafnarmeðlimir fórust. Í síðustu viku fórust svo vélar TransAsia Airways í Taívan með 48 um borð og Air Algerie í Malí með 119 um borð. Þar að auki hvarf MH370-vél Malaysia Airlines í marsmánuði með 239 manns um borð.

Þessar tíðu frásagnir af flugslysum hafa því fengið marga til að spyrja hvort loftferðir séu orðnar hættulegri en áður og hvort árið 2014 kunni að vera það mannskæðasta í flugsögunni. Þó að árið sé ekki nema rétt rúmlega hálfnað virðist svo ekki ætla að verða. Raunar langt frá því.

Á myndinni að neðan má sjá fjölda dauðsfalla í flugslysum eftir árum frá lokum síðari heimsstyrjaldarinnar árið 1945. Má sjá að flestir létust í flugslysum árið 1972, eða 2.429 manns.

Á síðasta ári létust 265 í flugslysum, en ekki höfðu færri látist í flugslysum á einu ári allt frá lokum síðari heimsstyrjaldarinnar. Líkt og myndin sýnir þá hefur dauðsföllum vegna flugslysa fækkað verulega síðustu áratugina.

Á þessu ári hefur dauðsföllum hins vegar rúmlega tvöfaldast frá fyrra ári og er árið þó ekki búið enn. Alls hafa 764 látist í tólf slysum með farþegaflugvélum, að sögn Aviation Safety Network sem heldur utan um slíkar upplýsingar.

Mannskæðasta einstaka flugslys sögunnar átti sér stað árið 1977 þegar 583 létust er tvær Boeing 747 vélar skullu saman á flugbraut á Tenerife.

Á myndinni að neðan má svo sjá fjölda flugslysa þar sem farþegaflugvélar hafa komið við sögu á hverju ári, allt frá lokum síðari heimsstyrjaldarinnar.