Yfirburðarsigur ÍR á Meistaramótinu

Sveit ÍR bar sigur úr býtum á 88. Meistaramóti Íslands í frjálsíþróttum sem lauk í Kaplakrika í dag.

Karlasveitin varð í fyrsta sæti með 33.078 stig og kvennasveitin endaði einnig í fyrsta sæti með 24.410 stig. Það gerir samtals 57.488 stig sem er nýtt stigamet.

ÍR-ingar luku Meistaramótinu á viðeigandi hátt; með sigri í tveimur síðustu greinunum sem voru 4x400 metra boðhlaup karla og kvenna.

Karlasveitin kom í mark á 3:24,36 mínútum en kvennasveitin fór hringina fjóra á samtals 3:51,27 mínútum. UFA varð í öðru sæti í kvennaboðhlaupinu en FH hjá körlunum.

Sveit FH varð í öðru sæti í stigakeppninni en bæði karla- og kvennasveit félagsins varð í öðru sæti á eftir ÍR. UFA varð í þriðja sæti í heildarstigakeppninni þar sem kvennasveitin náði þriðja sæti og karlasveitin fimmta sæti. Breiðablik varð í þriðja sæti í karlaflokki.

Hafdís Sigurðardóttir, UFA, var óumdeild drottning Meistaramótsins en hún vann sex gullverðlaun (100m, 200m, 400m, 4x100m, langstökk og þrístökk) og ein silfurverðlaun.

Efstu fimm í karlaflokki:

1. ÍR 33.078 stig

2. FH 12.388

3. Breiðablik 6.485

4. Ármann 6.399

5. UFA 5.637

Efstu fimm í kvennaflokki:

1. ÍR 24.410 stig

2. FH 14.739

3. UFA 13.893

4. Breiðablik 3.857

5. Fjölnir 2.918

Heildarstigakeppnin:

1. ÍR 57.488

2. FH 27.127

3. UFA 19.530

4. Breiðablik 10.342

5. Ármann 8.055