Abdusalamov er haldið sofandi eftir bardagan gegn Perez

Hnefaleikakappinn Magomed Abdusalamov var fluttur á sjúkrahús eftir bardaga gegn Mike Perez í Madison Square Gardan á aðfaranótt sunnudags en Abdusalamov tapaði bardaganum eftir tíu lotur á stigum.

Rússinn var svæfður strax eftir bardagann og er núna haldið sofandi sökum alvarlegra höfuðáverka sem hann hlaut eftir bardagann.

Perez náði góðu höggi á Abdusalamov í upphafi bardagans með þeim afleiðingum að hann nefbrotnaði. Abdusalamov kláraði bardagann en hann var áður ósigraður.

Rússinn mun einnig hafa handabrotnað í bardaganum og leit skelfilega út þegar honum var lokið. Eftir bardagann var hann flutur strax á Roosevelt-spítalann í New York og eftir heilaskanna kom í ljós að hann væri með smávægilegan blóðtappa í heila.

Eftir að hafa kvartað yfir ógleði og óþægindum í höfði var hann svæfður og er enn haldið sofandi.