Klúrir bangsar og Heimsálfuhopp

Á meðan flestar stúlkur munu líklegast flykkjast í bíóhúsin til að sjá myndina Magic Mike, sem fjallað er um hér að ofan, bjóða bíóhúsin þó upp á fleira góðgæti í vikunni því auk hennar voru tvær gamanmyndir frumsýndar í gær.

Höfundur vinsælu fullorðinsteiknimyndanna Family Guy og American Dad, Seth MacFarlane, hefur gert sér lítið fyrir og skellt í sína fyrstu kvikmynd í fullri lengd, grínmyndina Ted. Myndin fjallar um samband Johns Bennet við bangsann sinn, Ted, sem vaknar til lífsins eftir að John óskar þess sem barn. Þeir John og Ted urðu strax óaðskiljanlegir en málin flækjast þó þegar árin líða, stelpur fara að koma inn í myndina og áhugasviðin breytast. Hinn klúri bangsi þarf á endanum að læra að standa á eigin fótum og gerir það með kostulegum afleiðingum eins og reikna má með þegar MacFarlane er annars vegar. MacFarlane fer sjálfur með rödd bangsans, en í aðalhlutverkum eru Mark Wahlberg og Mila Kunis.

Ný mynd um félaga okkar af Ísöld kom einnig í bíóhúsin í gær en þessi fjórða mynd ber heitið Heimsálfuhopp. Í kjölfar náttúruhamfara klofnar heimurinn í heimsálfur og við það verða Manni, Diego og Siddi viðskila við restina af hópnum. Þeir leggja í mikla ferð til að komast aftur heim og lenda í hinum ýmsu ævintýrum á leiðinni, eins og við er að búast af þeim. Á meðan heldur Scrat áfram hinum eilífa eltingaleik við hnetuna sína.- trs