Kanye með áhyggjur af tengdó

Rapparinn Kanye West ku vera kominn í náðina hjá Kardashian-fjölskyldunni en hann hefur verið í sambandi með raunveruleikastjörnunni Kim Kardashian í nokkra mánuði. Parið er ekki feimið við sviðsljósið en þau hertaka nú rauðu dreglana á kvikmyndahátíðinni í Cannes.

West hefur nú miklar áhyggjur af móður kærustu sinnar, Kris Jenner, sem hefur aukið heimsóknir sínar til lýtalækna Los Angeles mikið. Móðir West lést árið 2007 eftir misheppnaða fitusogsaðgerð og hefur West biðlað til Jenner að fara varlega.

Það mun eflaust ekki draga úr vinsældum raunveruleikaþáttanna um Kardashian-fjölskylduna þegar West fer að birtast á skjánum en hann hefur samþykkt að vera með í næstu seríu.