Gerlausar ostabollur - Ebba eldar með Latabæ

Ebba eða PureEbba er komin í lið með Lata­bæ og ætlar nú að kenna allri fjölskyldunni að elda hollt í glænýrri matreiðslubók sem kemur í verslanir síðar í þessum mánuði.

Ebba deildir hér með Lífinu einföldum bollum úr bókinni.



Gerlausar ostabollur í bollakökuformum

Þessar eru í algjöru uppáhaldi heima hjá mér og yfirleitt bakaðar um helgar. Þær er fljótlegt að gera þótt innihaldslýsingin virðist flókin.



Innihald

350 g gróft spelt (eða gróft og fínt til helminga)

3 tsk vínsteinslyftiduft

1 tsk sjávarsalt

1-2 dl heitt vatn, fer eftir því hvort þið notið gróft eða fínt spelt, byrjið með 1 dl og bætið við í lokin ef með þarf

100 g rifinn feitur ostur (ég mæli með því að nota ost sem er eins lítið unninn og hægt er)

1 egg (má sleppa)

3 msk kaldpressuð ólífuolía

200 ml aukaefnalaus kókosmjólk (eða önnur mjólk sem þið viljið nota)

1-2 pressuð hvítlauksrif (má sleppa)

Aðferð

1. Ofninn hitaður í 180°C.

2. Spelti, lyftidufti og sjávarsalti blandað vel saman í skál.

3. Heitu vatni hellt yfir þurrefnin.

4. Rifnum osti bætt út í og blandað aftur aðeins saman.

5. Í annarri skál hrærið þið saman egg, olíu og kókosmjólk.

6. Hvítlauksrifið pressað og sett út í olíublönduna. Einnig má hér bæta við öllu öðru sem ykkur dettur í hug; rifnum parmesan, sólþurrkuðum tómötum, ólífum, chili, hverju sem er!

7. Þurrefnunum og blautu efnunum blandað saman með sleif en hrært sem minnst (ef deigið er of þurrt bætið þið aðeins við af heitu vatni, 1⁄2-1 desílítra eða svo).

8. Deigið (sem er fremur klístrað!) sett með tveimur skeiðum í bollakökuform (ég nota ofnskúffuna mína undir bollakökuformin). Þetta gerir 15- 20 form en magn fer eftir stærð formanna.

9. Bollurnar eru svo bakaðar í 15-18 mínútur.

*Það er gott að dýfa bollunum nýbökuðum í smá ólífuolíu og himalaja- eða sjávarsalt.

*Einnig er gott að blanda saman jöfnum hlutum af rauðu pestói, lífrænni tómatsósu og lífrænni tómatpúrru sem og vænni skvettu af kaldpressaðri ólífuolíu og dýfa svo í.