Steingrími var brugðið

Steingrímur J. Sigfússon, formaður VG, segir að sér hafi verið brugðið þegar hann áttaði sig á því að innlánssöfnun Landsbankans væri í útibúi en ekki dótturfélagi.

„Ég man hvað mér brá þegar ég áttaði mig á því að innlánssöfnun Landsbankans væru í útibúum en ekki dótturfélagi Landbankans. Þessar upplýsingar komu seint fram og lítil meðvitund um það hvaða máli þetta skipti," sagði Steingrímur fyrir Landsdómi í dag.

Steingrímur segist hafi gert sér grein fyrir því nokkur undangengin ár fyrir að óveður væri í aðsigi. „Það er skjalfest meðal annars í þingmálum sem ég var fyrsti flutningsmaður að," sagði Steingrímur.

Hins vegar hafi vísbendingarnar verið misvísandi og hann hafi ekki áttað sig á því að allt bankakerfið myndi hrynja fyrr en hann stóð frammi fyrir því að það væri að gerast.