Áhorfendur ruddust inn í hringinn og lömdu boxara

Áhorfendur gengu af göflunum eftir hnefaleikabardaga í Buenos Aires þar sem boxari frá Filippseyjum hafði rotað heimamann í tíundu lotu. John Riel Casimero rotaði heimamanninn Luis Alberto Lazarte með stæl og það kunnu heimamenn í stúkunni ekki að meta.

Þeir byrjuðu að kasta stólum og öðru lauslegu í Casimero og aðstoðarmenn hans. Þeir létu ekki þar við sitja heldur ruddust inn í hringinn og gengu á skrokk á filippseyingunum.

Casimero slapp við alvarleg meiðsl og fékk lögreglufylgd upp á hótel. Hann var í felum undir hringnum þegar lögreglan reyndi að ná tökum á stöðunni.

Lazarte kom síðan að hitta Casimero og bað hann innilega afsökunar.

Stjórnvöld í Filippseyjum eru æfareið yfir þessari uppákomu og hafa lagt inn formlega kvörtun til argentínsku ríkisstjórnarinnar.