Nei við Icesave

Að segja já eða nei við Icesave er spurningin um það hvort við ætlum að festa það í sessi í sögunni að almenningur taki ábyrgð á klúðri fjárglæframanna og þeirra sem féllu fyrir þeirra gylliboðum. Við svörum þessari spurningu neitandi. Með því að samþykkja að ábyrgjast svik og glæpi sem við höfum ekki tekið þátt í sendum við röng skilaboð út í samfélag okkar og stuðlum að enn meiri glæpum fjármálamanna og þátttöku gróðasækinna í þeim.



Sendum bönkunum þau skilaboð að þeir þurfi sjálfir að taka ábyrgð á sínu glæfraspili. Sendum þátttakendum í fjárhættuspili bankanna þau skilaboð að þeir geri það á eigin ábyrgð. Sendum stjórnvöldum þau skilaboð að hætta að styðja fársjúkt banka- og fjármálakerfi og snúa sér að því að byggja upp banka sem þjónusta almenning en ræna ekki. Sendum þau skilaboð til komandi kynslóða að það sé ljótt að stela og svíkja og að varast beri gylliboð hættulegra fjárglæframanna, jafnvel þótt þeir auglýsi sig fagurlega.



Þess vegna segjum við:

Nei við Icesave.

Nei við ofvöxnum bólubönkum.

Nei við fjársjúku fjármálakerfi.

Já við ofbeldislausri byltingu almennings og mennskri framtíð.