Kanadamenn segja sig frá Kyoto bókuninni

Stjórnvöld í Kanada ætla að segja sig formlega frá Kyoto bókuninni um niðurskurð á gróðurhúsalofttegundum.

Þetta tilkynnti umhverfisráðherra landsins, Peter Kent, í gærkvöldi. Í máli ráðherrans kom fram að bókunin væri ekki framtíðarvegur fyrir Kanada þar sem gífurlegur kostnaður yrði lagður á skattgreiðendur landsins ef Kanadamenn ætluðu sér að standa við skilyrði bókunarinnar.

Kent segir að samkvæmt Kyoto bókuninni þyrftu Kanadamenn að greiða sektir sem næmu 13,6 milljörðum dollara eða sem svarar til nær 200 þúsundum króna á hverja fjölskyldu í Kanada.