Barcelona í úrslit Meistaradeildarinnar

Barcelona er komið í úrslitaleik Meistaradeildar Evrópu eftir að liðið gerði í kvöld jafntefli við erkifjendur sína í Real Madrid á heimavelli, 1-1. Barcelona vann undanúrslitarimmu liðanna samanlagt, 3-1.

Staðan var markalaus í hálfleik en það var Pedro sem kom Börsungum yfir með marki á 53. mínútu. Marcelo náði að jafna metin fyrir Madrídinga tíu mínútum síðar en þar við sat. Barcelona mætir annað hvort Manchester United eða Schalke í úrslitaleiknum.

Börsungar voru reyndar stálheppnir að lenda ekki undir þegar að Gonzalo Higuain skoraði mark fyrir Real Madrid sem var dæmt ógilt.

Gestirnir frá Madríd byrjuðu betur í leiknum en leikmenn Barcelona voru þó fljótir að vinna sig inn í leikinn og réðu lengst af ferðinni. Það náði hámarki á um fimm mínútna kafla þegar að Barcelona fékk nokkur góð tækifæri til að skora.

Sergio Busquets átti skalla að marki sem Iker Casillas varði en spænski landsliðsmarkvörðurinn var vel með á nótunum. Hann varði tvívegis frá Lionel Messi, einu sinni frá David Villa og þá átti Pedro skot rétt fram hjá marki Madrídinga.

En í upphafi seinni hálfleiks skoraði Hugain svo markið sem var dæmt af. Cristiano Ronaldo var gefið að sök að hafa brotið á Javier Mascherano í aðdraganda marksins.

Aðeins fáeinum mínútum síðar komst Barcelona yfir. Andrés Iniesta átti glæsilega sendingu inn fyrir vörn Real á Pedro sem afgreiddi knöttinn snyrtilega í netið.

Real náði þó að bíta frá sér. Angel Di Maria átti skot í stöng en náði boltanum aftur og lagði hann fyrir Marcelo sem skoraði af stuttu færi.

Börsungar náðu þó að halda ró sinni og tryggðu sér farseðilinn á Wembley-leikvanginn, þar sem úrslitaleikurinn fer fram í lok mánaðarins.