Björgvin segir af sér formennsku í þingflokknum

Björgvin G. Sigurðsson, þingflokksformaður Samfylkingarinnar, ætlar að segja af sér formennsku í þingflokki Samfylkingarinnar. Björgvin var einn þeirra sjö sem Rannsóknarnefnd Alþingis telur að hafi gerst sekur um vanrækslu í starfi í aðdraganda bankahrunsins.

Björgvin sagðist í samtali við fréttastofu RÚV ætla að hvetja til þess að landsdómur verði kallaður saman. Það væri eina leiðin til að skera úr um þær ávirðingar sem komi fram í skýrslu Rannsóknarnefndar Alþingis.

Aðspurður sagði Björgvin þó ekki að það blasti við að hann myndi segja af sér þingmennsku vegna skýrslunnar.