Nemanja Vidic vill vera hjá Manchester United til 2012

Serbinn Nemanja Vidic hefur komið fram og eytt sögusögnum um að hann vilji fara frá Manchester United en miðvörðurinn hefur ekkert spilað með United á árinu 2010 vegna meiðsla á kálfa. Vidic tjáði sig um málið í viðtalið við serbneska blaðið Vecernje Novosti í Belgrad.

Nemanja Vidic segir þar að ekkert sé að sambandi hans og stjórans Sir Alex Ferguson eins og skrifaði hafi verið um í fjölmiðlum á síðustu dögum. Vidic er sáttur hjá Manchester United og ætlar sér að klára samninginn sinn sem rennur út 2012.

„Ég hef aldrei lent í einhverjum útistöðum við Sir Alex Ferguson og það er algjörlega ósatt að ég vilji fara frá United," segir Vidic í viðtalinu.

„Ég er með samning við United til ársins 2012 og ég ætla mér að virða hann til síðasta dags. United gerði mig að þeim leikmanni sem ég er í dag og það er ekkert til í því að ég sé að reyna að komast til Real Madrid og AC Milan," segir Vidic.

Vidic stefnir á það að verða með í seinni leiknum á móti AC Milan í Meistaradeildinni en hann fer fram 10. mars næstkomandi.

„Ég held að ég komist aftur af stað mjög fljótlega og vonandi kemst ég sem fyrst í mitt besta form og inn í byrjunarliðið," sagði Vidix og hrósaði félögum sínum í liðinu fyrir að hafa náð frábærum úrslitum í Mílanó.