Wenger: Fabregas elskar félagið

Arsene Wenger sagði eftir 6-0 sigur Arsenal á Braga í kvöld að hann hafi aldrei efast um hollustu Cesc Fabregas gagnvart fyrrnefnda félaginu.

Fabregas fór á kostum í leiknum. Hann skoraði tvö mörk og lagði upp tvö til viðbótar.

„Þetta var ekki auðvelt fyrir hann því hann hefur verið undir mikilli pressu," sagði Wenger, stjóri Arsenal, eftir leikinn. „En ég hef aldrei efast um að hann elskar félagið. Hann vill standa sig vel og er leiðtogi í liðinu."

Fabregas og hinn ungi Jack Wilshere náðu vel saman á miðju Arsenal í leiknum. „Það er erfitt að bera saman tvo leikmenn en báðir búa yfir sérstökum hæfileikum. Það sem er frábært er að Wilshere fær tækifæri að fylgjast með Fabregas og spila með honum."