Stórsigur Keflavíkur

Keflavík vann stórsigur á Snæfell í Iceland Express-deild kvenna í dag, 118-62.

Eins og tölurnar gefa til kynna var sigur Keflavíkur afar öruggur. Sérstaklega hafði Keflavík mikla yfirburði í öðrum leikhluta sem liðið vann með 36 stigum gegn níu. Staðan í hálfleik var 62-30.

Pálína Gunnlaugsdóttir skoraði 35 stig fyrir Keflavík og Jacquline Adamshick 28 auk þess sem hún tók fimmtán fráköst. Birna Valgarðarsdóttir skoraði nítján stig.

Hjá Snæfelli voru Hildur Björg Kjartansdóttir og Inga Muciniece stigahæstar með tólf stig hvor.

Keflavík hefur unnið alla þrjá leiki sína í deildinni til þessa og er á toppi deildarinnar með sex stig. Snæfellingar eru hins vegar á botninum, stigalausir.