Tinda­stóll tekur slaginn aftur í Evrópu­keppni

Þetta er staðfest á miðlum keppninnar og félagsins en Tindastóll varð á síðasta tímabili fyrsta íslenska félagið til að taka þátt í Norður-Evrópudeildinni.

Liðinu gekk vel og Tindastóll komst í sextán liða úrslit keppninnar, ásamt því að slá stigamet keppninnar með 125 stig í einum leik, en féll svo út gegn lettneska liðinu Zelli.

Norður-Evrópudeildin er að hefja sitt sjötta tímabil en keppnin er, þrátt fyrir nafn sitt, ekki bundin við Norðurlönd Evrópu. Lið frá Eystrasaltsríkjunum, Bretlandi, Búlgaríu, Rúmeníu og Kýprus eru meðal annars einnig skráð til leiks.

Fyrirkomulag næsta tímabils liggur ekki enn ljóst fyrir. Á bilinu 18 til 27 lið verða skráð til leiks.

Á síðasta tímabili spilaði hvert lið fjóra heimaleiki og fjóra útileiki. Tindastóll spilaði sína fjóra heimaleiki í Síkinu og fór fjórum sinnum erlendis, sem jók leikjaálagið mikið með Bónus deildina í fullum gangi líka.