Júlíus öflugur í frá­bærum sigri

Júlíus Mar byrjaði að venju í miðri vörn Kristiansund sem er í harðri fallbaráttu. Liðið sat í fimmtánda sæti fyrir leik dagsins, efra fallsætinu, þremur stigum frá öruggu sæti.

Tromsö var andstæðingur dagsins, lið sem er í þriðja sæti deildarinnar að berjast um að taka þátt í Evrópukeppni að ári.

Kristiansund lokaði hins vegar algjörlega á gestina í dag þar sem Júlíus þótti standa sig vel í vörninni. Framherjinn ungi Leander Alvheim skoraði þá mark í sitthvorum hálfleiknum til að veita Kristiansund 2-0 sigur.

Kristiansund fer með sigrinum upp í 13. Sæti, neðsta örugga sæti deildarinnar, með 19 stig. KFUM er einnig með 19 stig í umspilssæti um fall, því fjórtánda, og Álasund er með 18 stig í fimmtánda sætinu.

Stutt er upp í liðin fyrir ofan í jafnri botnbaráttunni en Sarpsborg er með 24 stig, HamKam með 23, Valerenga með 22 stig og Sandefjord með 20, stigi meira en Kristiansund.

Tromsö er sem fyrr með 35 stig í þriðja sæti, tveimur á undan Molde sem er í því fjórða en langt á eftir Bodö/Glimt og Viking sem berjast um titilinn.