Engin Meistaradeild - enginn Ribery

Franski landsliðsmaðurinn Franck Ribery hefur gefið til kynna að hann muni fara frá Bayern Munchen í sumar ef liðinu mistekst að tryggja sér sæti í Meistaradeildinni á næstu leiktíð.

Mikil ólga hefur verið í herbúðum Bayern undanfarna daga. Gengi liðsins hefur verið langt undir pari og Jurgen Klinsmann þjálfari fékk að gjalda fyrir það þegar hann var rekinn í byrjun vikunnar.

Ribery viðurkennir í samtali við franska blaðið L´Equipe að það sé ekki góð tilhugsun að vera áfram hjá Bayern ef liðinu tekst ekki að ná Evrópusæti í deildinni í vor.

"Það væri erfitt að halda áfram hér undir þeim kringumstæðum. Þess vegna þarf klúbburinn líka að tryggja að við endum í öðru sæti í það minnsta," sagði Ribery.

Bayern er sem stendur í þriðja sæti deildarinnar.