Henry: Arsenal má alls ekki selja Cesc Fábregas

Thierry Henry hefur skorað á hans gamla lið Arsenal að standast öll boð í Spánverjann Cesc Fábregas sama hversu hagstæð þau verða peningalega fyrir klúbbinn.

"Það er mjög mikilvægt að hann verði áfram hjá Arsenal. Cesc er fyrirliði liðsins, hann er ungur og ég er viss um að hann vilji vinna eitthvað með félaginu," sagði Henry en Fábregas hefur verið orðaður við núverandi lið hans, Barcelona.

Henry segir að þetta sé ekki rétti tíminn fyrir Fábregas til að koma á Camp Nou. Henry beinir líka orðum sínum til síns gamla félags.

"Arsenal á ekki að vera að stefna á það að vera meðal fjögurra efstu. Arsenal á að stefna á það að vinna meistaratitilinn. Þannig var það þegar ég spilaði þar og þannig á það að vera," sagði Henry.

Henry segir vonast eftir því að Arsenal vinni titla á næsta tímabili og hann segir liðið geta það.