Pacquiao og Mayweather munu ekki slást í Dallas

Það er nú orðið ljóst að bardagi þeirra Manny Pacquiao og Floyd Mayweather mun ekki fara fram á hinum stórglæsilega Cowboys Stadium í Dallas.

Ekki er vitað af hverju en talið er að hópur Mayweather hafi lagst gegn þessari hugmynd.

Margir voru afar spenntir fyrir því að halda hágæðaboxbardaga á þessum magnaða velli sem er flottasti íþróttaleikvangur heims að margra mati.

Allt að 100 þúsund manns hefðu getað séð bardagann á staðnum. Veðrið hefði heldur ekki skipt neinu því það er hægt að loka þakinu á vellinum.

Er nú fastlega búist við því að bardaginn fari fram í Las Vegas eins og flestir stóru bardagarnir.