Rahman mætir Klitschko í næsta mánuði

Fyrrum heimsmeistarinn í þungavigt Hasim Rahman frá Bandaríkjunum mun berjast við Úkraínumanninn Wladimir Klitschko í Mannheim í Þýskalandi þann 13. desember.

Klitschko er WBO, IBF og IBO meistari og átti upphaflega að berjast við Rússann Alexander Povetkin. Sá meiddist hinsvegar á fæti en Klitschko hefur staðfest á heimasíðu sinni að Rahman hlaupi í skarðið.

Rahman er 35 ára og á að baki 45 sigra á löngum ferli. "Þetta er frábært tækifæri fyrir mig. Klitschko á eftir að sjá eftir því að hafa valið mig," var haft eftir Rahman.

Hann hefur helst unnið sér það til frægðar að hafa rotað Lennox Lewis árið 2001.