Atorka vill úr Kauphöllinni

Atorka Group hefur farið fram á það við Kauphöllina að hlutabréf félagsins verði tekin úr viðskiptum. Í tilkynningu félagins er vísað til þess að í ljósi markaðsaðstæðna séu skilyrði fyrir rekstri skipulegs verðbréfamarkaðar á Íslandi naumast fyrir hendi og við þær forsendur geti eðlileg verðmyndun ekki átt sér stað með hlutabréf í félaginu þar sem enn ríki algjör óvissa á markaði. Boðað verður til hluthafafundar fljótlega þar sem lagt verður til að félagið verði tekið af markaði eins fljótt og unnt er.