Hitzfeld sáttur við að tapa stórt

Ottmar Hitzfeld, þjálfari Bayern Munchen, segist í samtali við Bild vera mjög ánægður með að hans menn hafi fengið 3-1 skell gegn Stuttgart í gær. Hann vill meina að tapið verði þá kannski til þess að vekja hans menn úr rotinu.

"Það var fínt að tapa leiknum með afgerandi hætti. Það er miklu betra að tapa þannig heldur en að tapa naumlega og kenna svo óheppni um allt saman. Þetta sýnir að við náum ekki árangri af sjálfu sér í vetur og því góð lexía fyrir mína menn," sagði Hitzfeld, sem hefur verið gangrýndur nokkuð fyrir leikaðferðir sínar af forráðamönnum Bayern - en það yrði þá ekki í fyrsta skipti.

Bayern hefur aðeins fengið tvö stig í síðustu þremur leikjum sínum í deildinni og er búið að tapa sex stiga forystu sinni á toppnum niður í eitt stig. Liðið vann átta af fyrstu tíu leikjum sínum í upphafi leiktíðar.