Vill áframhaldandi umboð til að stýra ríkisstjórninni

Geir H. Haarde, formaður Sjálfstæðisflokksins, sagði í ræðu sinni við fundarslit á landsfundi flokksins í dag að hann byði sig fram til að stýra ríkisstjórninni áfram og að hann væri sannfærður um að það myndi takast með stuðningi allra sjálfstæðismanna.

Geir, sem var endurkjörinn formaður með 95,8 prósentum atkvæða, sagði landsfund flokksins hafa verið kraftmikinn og benti á að 27 dagar væru til kosninga. Eins og varaformaðurinn Þorgerður Katrín Gunnarsdóttir hefði sagt væri mikið verk fram undan en sjálfstæðismenn hefðu mikið að byggja á.

Mikill árangur hefði náðst á síðustu árum. Búið hefði verið í haginn fyrir kraftmikið samfélag þar sem fólk vildi búa og sjálfstæðismenn væru vissir um það að besta leiðin til áframhaldandi krafts væri að treysta Sjálfstæðislflokknum fyrir stjórnvelinum.