Segir að stórlega hafi dregið úr pöntunum

Breskum ferðamönnum á leið til Íslands á vegum ferðaskrifstofunnar Discover the World hefur fækkað um allt að fjórðung síðan hvalveiðar hófust.

Þetta kemur fram á vefsíðu breska dagblaðsins Times í morgun. Talsmaður skrifstofunnar Clive Stacy, segir að ekki sé mikið um afpantanir heldur hafi dregið stórlega úr nýjum pöntunum, miðað við áætlanir.

Þær hafi gert ráð fyrir 50 til hundrað prósenta aukningu, segir hann, en rökstyður þá sprengingu ekki nánar. En miðað við heldur færri pantanir nú en verið hefur er samdrátturinn gríðarlegur miðað við spár um aukningu.

Times segir að ferðsskrifstofan sé ein sú umsvifamesta í Bretlandi á Íslandsferðum. Samkvæmt athugun fréttaastofunnar flutti hún sjö þúsund Breta hingað til lands í fyrra en þá komu hingað samtals 51 þúsund bretar.

Og fleira af þessum vettvangi: Umhverfisverndarsinnar hafa líka sett upp vefsíðu á Ebay þar sem þeir reyna að safna fyrir andvirði hvals og kaupa hann áður en hann verður veiddur.