Stefnir lífeyrissjóðunum ef ekki verður fallið frá skerðingu

Öryrkjabandalag Íslands hyggst stefna þeim lífeyrissjóðum sem hafa ákveðið að skerða eða fella niður lífeyrisgreiðslur til öryrkja ef ekki verður horfið frá þeirri framkvæmd. Þetta kemur fram í ályktun sem samþykkt var á fundi stjórnar bandalagsins í gær. Eins og greint hefur verið frá í fréttum stendur til að skerða eða fella niður örorkulífeyrisgreiðslur hjá 2300 lífeyrisþegum þann 1. nóvember vegna of hárra tekna þeirra. Segir enn fremur í ályktuninni að Öryrkjabandalagið lýsi fullri ábyrgð á hendur ASÍ, Sjómannasambandinu, Starfsgreinasambandinu og Samtökum atvinnulífsins.