Tyson Chandler á leið til New Orleans

Undanfarna daga hafa lið í NBA-deildinni verið dugleg að skoða leikmannamarkaðinn. Lið Chicago Bulls og New Orleans Hornets hafa þar verið fremst í flokki. Chicago fékk miðherjann Ben Wallace frá Detroit til liðs við sig á dögunum og hefur nú skipt framherja sínum Tyson Chandler til New Orleans fyrir þá PJ Brown og JR Smith. Ekki er langt síðan serbneska skyttan Peja Stojakovic gekk í raðir New Orleans frá Indiana.

Leikstjórnandinn gamalreyndi Derek Fisher er kominn til Utah Jazz frá Golden State, Vladimir Radmanovic fór frá LA Clippers til LA Lakers, Tim Thomas fór frá Phoenix til LA Clippers og Maurice Evans fór frá Detroit til LA Lakers.

Nýjustu tíðindi eru svo þau að Indiana hefur ákveðið að láta framherjann Austin Croshere til Dallas Mavericks í skiptum fyrir Marquis Daniels. Allar þessar hræringar verða svo staðfestar þann 12. júlí nk þegar liðunum verður heimilt að semja formlega við leikmenn.