"Bright Nights" í Árnesi

Rafræn Reykjavik hefur verið iðinn við kolann í vetur að kynna og bjóða íslendingum upp á fyrsta flokks raftónlistarmenn. Nú hafa þeir sett saman eina allsherjar listahátíð sem mun fara fram í félagsheimilinu Árnesi í Skeiða og Gnjúpverjahreppi helgina 9-11 júní.

Sett hefur verið saman ein glæsilegasta dagskrá sem sést hefur á Íslandi, bæði af íslenskum sem erlendum listamönnum, má þar nefna bönd eins og Sometime og Dr.Disco Shrimp, einnig munu koma fram frá Íslandi: Hermigervill, Biggi veira úr GusGus, Kiki ow, Reykjavik swing orchestra, Ruxpin, Frank murder, Mr.silla og margir fleiri.

Erlendu listamennirnir sem fram koma eru ekki af verri endanum, Sebestian Tellier frá Frakklandi, Daedelus frá Californiu, Judith Juillerat frá Sviss, Misc. frá Köln, Ada frá Köln og síðast en ekki síst kóngur og drottning "electro" tónlistarinnar Ellen Allien & Apparat frá Berlin. Alls eru um fjörtíu listamenn sem koma fram á þessum þremur kvöldum.

Hátíðinni er skipt niður á þrjá daga 9-11. júní frá kl. 18:00 á föstudegi til 01:00 aðfararnótt mánudags. Haldnir verða tónleikar á litlu sviði á daginn og þar mun tónlist sem hentar veðráttunni vera spiluð. Um kvöldmatarleitið verður tónleikahaldið fært inn í félagsheimilið, þar sem haldnir verða magnaðir tónleikar til klukkan þrjú eftir miðnætti.

Nýlistasafnið mun standa fyrir ýmsum viðburðum s.s. videolist, ljósmyndasýningum og fleira.

Einnig verður á svæðinu markaður sem margir af efnilegustu hönnuðum Íslands verða að selja varning sinn. Allt frá skartgripum til nudds verður á boðstólnum.

Tjaldstæði er 20 metrum frá félagsheimilinu þar sem er grillaðstaða, sturtur, salernisaðstaða og heitur pottur. Einnig er mjög góð sundlaug u.þ.b. 50 metra frá svæðinu. Árnes er á suðurlandi ca. 90 km frá Reykjavík og er umkringt af fallegri náttúru.

Miðaverð er 7500 kr. og er tjaldstæði innifalið i verðinu og verða miðarnir fáanlegir í 12 Tónum og Smekkleysubúðinni.

Nánari upplýsingar má finna á heimasíðu hátíðarinnar