20 ár í Eurovision

Hin magnaða safnskífa "Til hamingju Ísland! 20 ár í Eurovision" er komin út. Eins og nafnið gefur til kynna geymir hún þau íslensku lög sem keppt hafa til úrslita fyrir Íslands hönd í Söngvakeppni evrópskra sjónvarpsstöðva allt frá því að Ísland tók þátt í fyrsta sinn með Gleðibankanum í Bergen árið 1986. Síðan eru liðin 20 ár og nú sendum við Silvíu Nótt til keppninnar og er það 19. lagið sem keppir fyrir hönd Frónbúa.

Lögin eru aðeins 19 talsins á 20 árum því tvisvar sinnum tók Ísland ekki þátt, því árangur ársins á undan gaf ekki þátttökurétt og gerði það að verkum að við sátum hjá í eitt ár. Fulltrúarnir 19 eru fjölbreyttir en allir eftirminnilegir hver á sinn hátt, en líklega slær framlag okkar í ár allt annað út hvað varðar það atriði. Það sem gerir þessa safnútgáfu afar sérstæða er að auk hinna opinberu framlaga Íslands, eru einnig á plötunni 15 laganna í öðrum útgáfum.

Allt til ársins 1999 máttu Íslendingar aðeins flytja sitt lag á íslensku í keppninni og því var framlag okkar ár hvert einnig útbúið á enskri tungu, ef ske kynni að við hrósuðum sigri.

Frá og með All Out Of Luck frá því herrans ári 1999 hafa öll lögin hins vegar verið flutt á ensku en þrjú þeirra voru raunar einnig tekin upp á íslensku. Öll lögin í opinberum útgáfum eru því á plötunni auk 15 laga í öðruvísi útgáfum sem flestar hverjar hafa verið ófáanlegar um langa hríð og jafnvel aldrei áður fáanlegar íslenskum plötukaupendum.