Stofna dreifingarfyrirtæki í Danmörku

Post Danmark og 365 Media Scandinavia, dótturfélag Dagsbrúnar, hafa komist að samkomulagi um stofnun sameiginlegs dreifingarfyrirtækis í Danmörku. Fyrirtækið kemur til með að dreifa Nyhedsavisen, væntanlegu fríblaði 365 Media, á landsvísu í Danmörku.

Dreifingarfyrirtækinu hefur ekki enn verið gefið nafn, en 365 Media Scandinavia mun eiga í því 51 prósent og Post Danmark 49 prósent.

Við komum einfaldlega á fót því dreifingarkerfi sem skortur hefur verið á í Danmörku fyrir dreifingu ómerktra sendinga og tryggjum að þeim verði komið til viðtakenda fyrir klukkan 7 á hverjum morgni sex daga vikunnar. Við hlökkum til að nýta reynslu okkar á nýjum markaði, segir Helge Israelsen, forstjóri Post Danmark.

Svenn Dam, forstjóri 365 Media í Danmörku, segir litið á stofnun dreifingarfyrirtækisins sem loka­áfangans í undirbúningi þess að koma á fót fríblaðinu Nyhedsavisen. Við vitum hversu mikilvægt það er að engum hefur tekist að ná utan um dreifingarmálin. Þess vegna er það augljóslega mikið tækifæri að komast í samstarf við fyrirtæki sem þekkir dreifingarmál í Danmörku hvað best, segir hann.

Post Danmark er í meirihlutaeigu danska ríkisins. Í viðtali við viðskiptablaðið Børsen í gær veltir fjölmiðlafræðingurinn Jørgen Poulsen upp þeirri spurningu hvort nýju dreifingarfyrirtæki verði stætt á að neita að dreifa fríblöðum samkeppnisaðila, svo sem fyrirhuguðu blaði Jyllands-Posten og Politiken. Samkeppniseftirlitið danska hefur málið til skoðunar.